دكتور أبو الفتوح كنت احد الأسباب التي جعلت ابنتي تصل الى هذه المفاهيم. فشكرا لك
هذا ما قالته ابنتي
يا ماما لو كل الناس اتخلت عن أبوالفتوح فاحنا الشباب معاه باذن الله لأنه علمنا كتير أوي منها التخطيط والتفكير والعمل الجماعي احنا شفنا ازاي اختار الفريق بتاعه من كل أطياف المجتمع وازاي كان أهم معيار عنده الكفاءة وشفنا هو ازاي حاولوا يشوهوه سواء ناس بتتشدق بالأخلاق والمفروض انهم اسلاميين أو ناس بتتشدق بالحريات والمفروض انهم ليبراليين ... احنا اتعلمنا منه الكفاح أول ما بدأ كان غير معروف وكانت المجموعة اللي معاه صغيرة جدا ولكن ماشاء الله شوفي دلوقتي عدد المؤيدين وكل شوية بيزيدوا مع شغل سنة كاملة ومفيش راحة منه ومن حملته
احنا اتعلمنا منه احترام الآخر ولو تطاول هو لا نتطاول احنا واننا بنمشي حسب أخلاقنا مش أخلاق اللي قدامنا ولو غيرنا استخدم أساليب تشويه غير اخلاقية فاحنا منستخدمهاش
اتعلمنا منه اننا منقدسهوش وانه ممكن يغلط واننا نصححله ونخالفه وممكن كمان توصل اننا نهاجمه ويتقبل عادي
اتعلمنا منه اننا مش بندعمه لشخصه لكن احنا بندعمه لمشروعه اننا مش بندعمه كفرد احنا بندعمه هو والفريق اللي معاه والحملة كلها احنا بندعم مشروع للوطن لكل الوطن
اتعلمنا منه لو تعارض مصلحة جماعة مهما كانت ومهما قضيت فيها من عمر مع مصلحة وطني وبلدي فمصلحة بلدي أولى من أي حاجة تانية
اتعلمنا منه ان مش من عاشر القوم أربعين يوم صار منهم ممكن تختلف عنهم واختلافك ده هيعملك مشاكل كتير بس ربنا بيثبتك
اتعلمنا منه التواضع و... و... هقول ايه ولا ايه ده مدرسة يا ماما ماشاء الله عليه
ولا يضره ولن يضره باذن الله افتراءات اخوة وأصدقاء كفاح سابقين ولا كيد أعداء حاليين
وأكتر حاجة مطمناني حتى لو لا قدر الله مفازش ان أغلب مؤيدين أبوالفتوح دول جيلي وسني والمستقبل لينا واحنا مش هنسيب أي حد مهما كان وبأي مبرر أو تحت أي مسمى أو ادعاء انه يعبث بالمستقبل ده أو يمسه بسوء
احنا بلدنا رجعت لنا ومش هنفرط فيها أبدا بعون الله
شكرا .. شكرا ..شكرا
